Exhibitions

ÚTÓPÍA/STAÐLEYSA Margrét Jónsdóttir

Velkomin á sýningu Margrétar Jónsdóttur ÚTÓPÍA/STAÐLEYSA í Grafíksalnum Hafnarhúsinu, hafnarmegin þann 16 september kl. 16:00 til 19:00.


Sýningin stendur yfir til 2. október og er opin alla daga frá kl. 14 –18. Margrét sýnir verk sem hún hefur unnið undanfarin 3 ár og málað með náttúrulegum efnum.

Grónar leiðir / Fertile Paths 25.08-11.11.22 Aðalheiður Valgeirsdóttir

Velkomin á opnun sýningar Aðalheiðar Valgeirsdóttur Grónar leiðir/ Fertile Paths í Grafíksalnum fimmtudaginn 25. ágúst kl. 17:00.

Á sýningunni eru ný málverk og vatnslitamyndir.

Málverk Aðalheiðar Valgeirsdóttur eru myndir af gróandanum í lífinu, dýrðinni, óreiðunni, hinu snertanlega og ósnertanlega, leiðum og leiðartálmum náttúrunnar; þáttum er leggja örlagavegi í lífi okkar. Gróðurinn, litauðgi og mild hreyfingin á myndfletinum lokkar okkur til sín, við svífum inn í myndirnar og öndum inn í hæga hreyfingu plantnanna sem greina má á þeim. Ef til vill erum við á göngu innan um vatnagras sem ættað er samt aðallega úr kvikmyndaminni. Ef til vill upplifum við einskonar draumaútfærslu á flækjum og lausnum í vökulífinu.
Inn í hvaða vídd veraldar erum við komin?
Við göngum inn í ástand, inn í lífræna óreiðu þar sem við þó vitum að ríkja afar heillandi og vel uppbyggð kerfi, sem starfað hafa frá því fyrir okkar tíma og munu starfa eftir okkar dag.
Þessi óreiða, ástandið, teygir sig útfyrir strigann. Striginn felur í sér uppstækkaða mynd af víðfeðmara umhverfi.

Í olíumálverkunum sjáum við glitta í heiðan himin eða bláleita vatnsuppsprettu á milli plöntustilkanna, sem raðast upp í eins og þunnu lagi af óreiðu. Þetta eru síkvik eilífðarmynstur sem hér eru fest í málverkinu. Í þessum verkum standa þeir sterkir en dreifðir svo loftrými myndast á milli þeirra, svokallað negatíft rými. Óræður bakgrunnurinn gefur engar staðarupplýsingar upp aðrar en þær að við séum stödd í skálduðu andrými, rými þar sem skynja má spennu vegna þess óræða sem býr inn á milli stilkanna og gæti mætt okkur á svipstundu. Við greinum ekki sérstaka árstíð, plönturnar búa yfir lífi og krafti en á þeim eru hvorki auðsjáanleg blóm né önnur merki um hvar í þeirra eigin lífshringrás við komum að þeim. Á sumum verkanna má etv. greina dýralíf á milli plöntustilkanna. Við erum minnt á að jörðin er lifandi og öll erum við hluti af lífskeðju, sem er í senn forgengileg, viðkvæm og sterk, falleg og fullkomin í breyskleika sínum.

Málverkin eru ekki gluggasýn af raunverulegu umhverfi, þau eiga sér ekki sérstakar fyrirmyndir og eru í raun ekki af ákveðnum stað eða tegundum heldur mætti segja að þau endurspegli ástand þess sem dýrkar náttúruna, litadýrð hennar, dulmagn og hina óendanlegu snilli sem býr í kerfum hennar; hinu háþróaða rótar- og boðskiptakerfi, óreiðukenndum sýnileika plantna ofanjarðar, dreifikerfi frjókorna með vindi og fyrir tilstilli skordýra og heilagri geómetríu forma þeirra. Sá sem dýrkar náttúruna er hluti af henni, við sem horfum á myndirnar fáum hlutdeild í skynjun á plöntulífi í gegnum sjónarhorn einhvers sem er meira en áhorfandi, sjónarhornið er þess sem er hluti af plöntuheildinni.

Á sýningunni má sjá bæði stór olíumálverk og minni vatnslitamálverk sem unnin eru á árunum 2021 og 2022. Þetta eru afar litrík verk, máluð af sterku innsæi og öryggi í þunnum lögum og tæpast í litatónum er sjást í íslenskri náttúru. Þetta eru lagskiptar myndir af dularfullu rými, er sveiflast á milli mikillar dýptar og birtu. Þessi birtingarmynd náttúrunnar gæti verið hvaðan sem er í heiminum. Það er suðrænn blær yfir litasamsetningunni, og hiti.
Við erum með sólina í bakið og okkur er hlýtt.
Á náttúrugöngu innan þessara mynda mýkist augnaráð okkar og opnast. Við verðum eftirtektarsamari, meðvitaðri um hringrásir lífsins og þessi slaka athygli gerir okkur andlega móttækilegri fyrir öðrum orkusviðum tilverunnar. Það er ávallt áhugavert að íhuga, á menningarlegum grundvelli, hvað gerist við það að myndgera náttúru og ennfremur náttúru sem ekki á sér raunverulega fyrirmynd. Er slík myndgerð leið til innra samtals við náttúruna í sjálfum okkur, náttúru sem hugarástands, leið til að tengja okkar eigið rótarkerfi neðar í jarðveginn?

 Birta Guðjónsdóttir

Litaóm – 6.08-21.08

Sýningin Litaóm er samstarfsverkefni myndlistarmannanna ÓIafar Rúnar Benediktsdóttur, Unnar G. Óttarsdóttur og Ránar Jónsdóttur.

Sýningin “Litaóm”, opnar laugardaginn 6. ágúst kl. 16-18 í Grafíksalnum, Tryggvagötu 17, Reykjavík (Hafnarhúsið, gengið inn hafnarmegin). Sýningin stendur yfir til 21. ágúst. Opnunartímar eru fimmtudagur til sunnudags kl. 14.00-17.00. Öll hjartanlega velkomin.
Sýningin Litaóm er samstarfsverkefni myndlistarmannanna ÓIafar Rúnar Benediktsdóttur, Unnar G. Óttarsdóttur og Ránar Jónsdóttur. Þær hafa unnið saman og haldið myndlistarsýningar, síðan þær luku allar námi frá myndlistardeild Listaháskóla Íslands, sem listatvíeykin Yottazetta annars vegar og Bergmann Skagfjörð hins vegar.

Á sýningunni Litaóm kanna listamennirnir litbrigði í myndum, hljóði og tilfinningum. Verkin á sýningunni eru þátttökugjörningur, 3-víður skúlptúr, hljóðskúlptúr og tvívíð verk.
Verk Unnar nefnist Líðan í litum. Fjallar það um að tilfinningar gefa lífinu lit. Litir kalla á líðan og líðan birtist í litum. Meðvitund um líðan og tenging við liti eflir tilfinningatakt (e. reglulation). Áhorfendum gefst tækifæri til að taka þátt í verkinu.

Verk Ólafar er hljóðverk unnið úr upptökum teknar í túrbínuhúsum heimarafstöðva í Vestur-Skaftafellssýslu. Með eftirvinnslu breytir hún hljóðunum og einangrar ýmis blæbrigði sem hún fléttar svo saman í margbreytilega hljóðmynd. Hljóðverkinu fylgja teikningar sem eru unnar upp úr fundnum landslagsteikningum og vélarmyndum. Myndefnið sem verkin eru unnin útfrá er mestmegnis fengið úr bókum á bókasafni orkustofnunar.

Á sýningunni eru nokkur verk sem Ólöf og Rán unnu saman sem listatvíeykið Yottazetta. Þær teikningar eru unnar út frá Maxwell jöfnum rafeðlisfræðinnar, en höfundur þeirra ætlaði þeim að lýsa eiginleikum rafsegulbylgja sem eru efniviður ljóss og lita og hljóðvinnslu
Verk Ránar er samsett úr 3-víðum skúlptúrum og málverkum og eru leikur með vísun í gömul og ný litakerfi, einkum litakerfi Philip Otto Runge sem var uppi um 1800. Verkin eru í mismunandi litum sem unnir eru úr grátónum og 3 grunnlitum.

Ólöf hefur starfað sem myndlistamaður, skáld og tónlistamaður. Hún hefur sett upp sýningar víðs vegar um land, þ.á.m. í Alþýðuhúsinu á Siglufirði, í verksmiðjunni á Hjalteyri og á LUNGA á Seyðisfirði. Um þessar mundir spilar hún með hljómsveitinni Svartþoku samhliða myndlistinni.

Rán er með msc gráðu í rafmagnsverkfræði og starfar sem verkfræðingur og myndlistarmaður auk þess sem hún rekur auk þess eigið fyrirtæki: Hálogi Distillery Reykjavík.

Unnur er starfandi myndlistarmaður og listmeðferðarfræðingur (PhD) og fjalla mörg verk hennar um tengingu á milli þessara tveggja faggreina. Listaverk Unnar hafa verið sýnd í hóp- og einkasýningum, m.a. í Listasafninu á Akureyri, Listasafninu á Ísafirði, Listasafni Reykjavíkur, Listasafni Færeyja, Edsvik Kunstall í Stokkhólmi og Lorgo das Artes í Brasilíu

Sigla Binda – Bókverkasýning 

Verk eftir Svanborg Mattiasdóttir – Haf
Í sal Íslenskrar Grafíkur í Hafnarhúsinu í Reykjavík, 16. júní – 3. júlí 2022.   

 

,,SIGLA BINDA“ er samvinnuverkefni tveggja listhópa: Arkir frá Íslandi og Codex Polaris frá Noregi. Listamennirnir sem taka þátt í verkefninu eru 10 talsins, fimm frá hvoru landi.  Kveikjan að samstarfinu er sameiginleg ástríða allra þátttakenda fyrir bókverkalistinni, metnaður til að skapa nýja list og áhugi á samvinnu og samtali um menningararfinn. Menning Íslands og Noregs eiga sér sameiginlegar rætur, í tungumáli og sögu og lífsbaráttu í norðrinu. 

Þátttakendur í sýningunni eru: Anna Snædís Sigmarsdóttir, Ingiríður Óðinsdóttir, Kristín Þóra Guðbjartsdóttir, Sigurborg Stefánsdóttir, Svanborg Matthíasdóttir, Nanna Gunhild Amstrup, Solveig Landa, Rita Marhaug, Imi Maufe og Randi Annie Strand. 

Opnun sýningarinnar verður fimmtudaginnn 16. júní kl. 17:00. 

Sýningin er opin alla fimmtudaga til sunnudaga frá kl. 13 – 17.   

Allir velkomnir.   

Nánast portrett – Victor Cilia

Nánast portrett – Myndlistarsýning Victors G. Cilia

Þann 26. mai kl.16 opnar Victor Cilia sýningu sína. “Nánast portrett” í sýningarsal Íslenskrar Grafíkur að Tryggvagötu 17, Rvk. hafnarmegin. Sýningin stendur til 12 júní

Á sýningunni eru pastelmyndir sem eru unnar á árunum 2018 til 2021.

Verkin eru I beinu framhaldi af fyrri verkum Victors nema kanski að hann notar pastelliti frekar en olíu.
“Ég hef notað Pastelliti mjög mikið hingað til í stórar skissur fyrir málverk og hugmyndavinnu en prófaði að fara alla leið með þær og fullvinna sem pastelverk.
Victor notar portrett myndir sem nokkurskonar þema í sýningunni sem gefur verkunum vissa jarðtengingu. Af og til losnar um portrett myndbygginguna og formin fara á flot. Enda eru þetta ekki portertt, en nánast.

20/20 Sölusýning til styrktar flóttamönnum frá Úkraínu

Hvert þrykk kostar kr.5000.-

Helgina 20.– 22. maí mun Íslensk Grafík efna til samsýningar á grafíkverkum listamanna víðsvegar að, sem hafa tekið þátt í alþjóðlegri „ferðasýningu“ 20/20 í sýningarsal Íslenskrar Grafíkur að Tryggvagötu 17, Rvk.

Opnun föstudag 20. mai kl 17–19
laugardag 21. mai kl.14 -17 og sunnudag 22. maí kl. 14 – 17

Ferlið bakvið þessar 20/20 sýningar er að þeir sem tekið hafa þátt unnu grafíkverk í 25 eintökum í stærðinni 20×20 og þar blandast verkin inn í möppur með öðrum 20/20 listamönnum frá öðrum grafíkverkstæðum um allan heim.
Fær hver þátttakandi senda möppu til baka frá Hot Bed Press með 20 ólíkum verkum ásamt eintaki eftir sig. Öll verkin fara svo á Flickr síðu þeirra: (www.flickr.com/photos/hot_bed_press).
Verkin hafa einnig verið til sýnis víðsvegar um heiminn en nú gefst áhugasömum tækifæri til þess að líta listaverkin augum og kaupa ef vill. En íslenskir grafíklistamenn hafa tekið höndum saman og ákveðið að gefa verk úr sinni möppu og mun ágóðinn renna til félagsins og til flóttamanna Úkraínu .

Rut Rebekka – Málverk og grafík

Málverk og Grafík.

Rut Rebekka opnar sýningu í Íslensk Grafík  Laugardaginn 2 apríl kl.14

Málverkin eru olía á striga, máluð 2019 til 2022, grafíkin er olíu sáldþrykk.

Sýningin er opin kl.14 til 17 fimmtudaga til sunnudaga og lýkur sunnudaginn 17 apríl  kl.17:30. Allir velkomnir.

Þetta er 24 einkasýning Rutar Rebekku Sigurjónsdóttur, en hún er fædd í Reykjavík 1944. Hún hefur stundað myndlist í 48 ár og hennar helstu einkasýningar hafa verið á Kjarvalsstöðum, í Hafnarborg, í Norræna húsinu, Gallerie GammelStrand Kaupmannahöfn, Hamar Kunstforening Noregi, Piteaa Kunstforening Svíþjóð og fleiristöðum. Ásamt tekið þátt í fjölmörgum  samsýningum hérlendis og erlendis eins og í  Beiing Kína, New york, Boston, Munchen, Heidelberg, Köln, Aarhus Kunstforening. Næstved Danmörku og fleirri stöðum.

Listnám sitt stundaði Rut Rebekka í Myndlistaskóla Reykjavíkur, Myndlista og handíðaskóla Íslands og í Skidmore Collage NY USA. Unnið í vinnustofum  erlendis eins og í Danmörku. Sveaborg Finnlandi, Kjarvalsstofu  París og verið gestakennari í myndlist í Skidmore Collage NY.

Jimin Lee – One Day

Fimmtudaginn 17. mars nk, kl. 17-19 opnar Jimin Lee sýninguna “One Day”.
Hún verður viðstödd opnunina og verður með listamannaspjall (artists presentation).
Verið velkomin.
Sýningin stendur frá 17.03-26.03. 2022.

Jimin Lee will open her solo exhibition “One Day”  on Thursday, March 17, 2022 from 5pm-7pm and will holding a presentation Opening hours are from 2-5pm Thursdays – Sundays. Free admission.
   
She will be showing multi-form print media work, including a new series about vulnerability, decline and loss that draws on both personal experience and world events.  
 
Jimin Lee is a Korean-born California-based artist. Since 1995 she has been living in the San Francisco Bay Area, is a professor of art and heads the print media program at the University of California, Santa Cruz, USA as well as the Contemporary Print Media Research Center. 
  
For many years, she has focused on themes of mobility, displacement and labor on the personal and social level as seen in traffic, places of transport, or objects that move or are “in transit” — travel in both the daily and in the migratory sense. 
 
Her research and practice center on the area of photo-based prints.  In recent years she investigated and developed a new option and possibility in print media by adopting emerging print strategies in an expanded art context.  For example, by integrating the traditional woodcut with laser-cutting and inkjet printing processes, she birthed a new creative formula of her own that blends conventional mediums of print and contemporary digital technology so that they interplay with and reshape each other.  While using digital tools and applications has been a critical part of her image-making, she has continued to use the great hands-on, tactile techniques that belong to the long and storied history of printmaking.  

https://www.jiminleeart.net/ 

EFNI & RÝMI

Þóra Sigurðardóttir

Salur Félagsins íslensk grafík, Hafnarhúsi, Tryggvagötu 17
Laugardaginn 12. febrúar nk. kl. 14:00 – 17:00
Sýningin stendur frá 12.02. til 06.03. 2022

Á sýningunni eru ætingar, prentaðar af málmplötum á bómullarpappír og teikningar unnar á hörstriga. Opið kl. 14:00 – 17:00 þann 12.febrúar.
Þóra Sigurðardóttir hefur sýnt verk sín reglulega á samsýningum og einkasýningum. Hún hefur starfað við listkennslu, sýningarstjórn og var skólastjóri Myndlistaskólans í Reykjavík um árabil. Hún rekur nú ásamt Sumarliða Ísleifssyni Sýningarrými að Nýp á Skarðsströnd www.nyp.is.

Þóra hóf að kenna við Myndlistaskólann í Reykjavík árið 1985, en hélt utan tveimur árum síðar og stundaði framhaldsnám í skúlptúr og rými í Danmörku. Eftir framhaldsnámið kenndi Þóra grunnatriði teikningar og rýmis í listaskólum, en vann jafnframt með efni, rými og teikningu í
eigin verkum. Þessi grunnur er viðfangsefni í þeim verkum sem Þóra sýnir nú; teikningar með grafíti, bleki, kolum og eggtempera á hörstriga – ásamt teikningum sem útfærðar eru með ætingu í málm, handprentaðar á 270 gr. bómullarpappír. Prentverkin eru unnin á hausti 2021 í vinnustofudvöl í Feneyjum og á grafíkverkstæðinu í Hafnarhúsi, en teikningarnar eru frá sl. 3 árum. Etv. mætti segja að verkin innihaldi að nokkru leyti eiginleika skúlptúrs, þar sem lag er lagt ofan á lag af efni, hlaðið upp af láréttu plani pappírsins/strigans.

Verk Þóru Sigurðardóttur eru í eigu opinberra safna og einkasafna hér á
landi og erlendis.
Sýningin er í sal Félagsins íslensk grafík, Hafnarhúsi, Tryggvagötu 17, inngangur snýr að höfninni.
Opið kl. 14:00 – 17:00 miðvikudaga, fimmtudaga, föstudaga og laugardaga.

Listamaður Grafíkvina 2022 Marilyn Herdís Mellk

Birtuskil” – “Contrast”

Listamaður Grafíkvina 2022 er Marilyn Herdís Mellk og mun hún sýna úrval af grafíkverkum unnin frá 1987 og fram til dagsins í dag 4. febrúar frá kl. 18-20 og 5. og 6. frá kl.14-17 í sal félagsins á Vetrarhátíð.

“Á gönguferðum með hundunum mínum fell ég oft í stafi yfir hinni ómótstæðilegu fegurð birtunnar. Á þessum stundum staldra ég við og reyni að festa á filmu augnablikið, áferð og andstæður til að vinna áfram með á vinnustofunni minni.  Verkið „Birtuskil“ var unnið undir áhrifum gönguferðar fyrir ofan Rauðavatn. Það var einmitt á einum þessara daga þegar birtan var eins og annars heims og friðsældin ríkti.” MHM 

Marilyn Herdís, fædd 1961 er af íslensku bergi brotin og hefur búið og starfað í Reykjavík síðan 1981. Hún stundaði listnám við California College of the Arts og Myndlista og Handíðaskóla Íslands, nú LHÍ, þaðan sem  hún útskrifaðist 1987 úr grafíkdeild. Marilyn hefur haldið einkasýningar og tekið þátt í fjölmörgum samsýningum bæði hérlendis og erlendis. Hún er félagi í Íslenskri grafík, Sambandi íslenskra myndlistarmanna og er í stjórn ÍG.  www.instagram.com/marilynmellk/ arkiv.is | Marilyn Herdís Mellk  

Marilyn Herdís Mellk is this year’s artist for the “Grafíkvinir” which will be exhibited alongside her work at Íslensk grafík Friday, February 4th from 6-8 pm, Saturday and Sunday from 2-5 pm. 

 “Often when walking my dogs, the light is so mesmerizing that I have to stop to take in the fleeting beauty of it all.  I snap a few pictures to try and catch the moment, contrasts and textures to work on in my studio at a later date.  “Contrast ” was inspired after a walk on the trails behind Rauðavatn. It was one of those days when the light was otherworldly and peaceful.” MHM 

Marilyn Herdís is an Icelandic/ American, born in 1961 and has been living and working in Iceland since 1981. After studying art at the California College of Arts and Crafts, she continued her studies at the Icelandic College of Arts and Crafts where she graduated in 1987 from the printmaking department. She has held solo exhibitions as well as taken part in many group exhibitions in Iceland and other countries as well as being an active member of the Icelandic Printmakers Association and the Association of Icelandic Visual Artists.  www.instagram.com/marilynmellk/ arkiv.is | Marilyn Herdís Mellk 

Stærð myndar er 18,0 x 10,0 cm, stærð pappírs er 28,0 x 20,0 cm í 70 eintökum. Akua eiturefnalausir þrykklitir á Hahnemühle ætingarpappír 300 gsm.  Aðferð: 2 plötur- koparæting/ akvatinta og sólarplata, handmáluð með vatnslitum frá Winsor & Newton. 
Plate size –18,0 x 10,0 cm, paper size – 28,0 x 20,0 cm, edition 70.  Akua non-toxic inks on Hahnemühle etching paper 300 gsm. Technique: 2 plates - copper etching/aquatint and solarplate, handpainted with watercolors from Winsor & Newton.