Exhibitions

Listamaður Grafíkvina 2025 Helgi Þorgils Friðjónsson

isgrafik

Senn líður að útgáfu hinnar árlegu Grafíkvinamyndar hjá Íslenskri grafík. 

Listamaður ársins 2025 er Helgi Þorgils Friðjónsson

“Spegill”

Stærð myndarinnar er 18,0 x 23 cm, stærð pappír 21,0 x 29,7 cm í 70 eintökum. 

Tækni er dúkrista.

“Skýjafar fjærst eins og kyrrt ljósflökt að kvöldi eða að morgni. Sjóndeildarhringur þverlína yfir myndflötinn og honum fylgt eftir með löngum djúpum þveröldum, eða meira eins og sjórinn andi stórum löngum djúpum andardrætti og renni saman við hugmynd um tíbránna. Þegar framar dregur í myndflötinn breytist sjórinn í létt leikandi öldur og öldugjálfur og grípur í sig skýjaflöktið. Svo steinvölur á strönd.

Vængirnir endurtaka form aldanna og efniskennd skýjanna og fljúga eins og ljósið og hár sundmannsins fylgir langljóslínum djúpaldanna og blekkingu tíbrárinnar. Nefið fylgir öldunum líka eftir og hverfur í tíbránna og langlínurnar sem gera einskonar spé spegilmynd og styður þannig sjónhverfinguna. Maríuerla speglar sjálfa sig og er með gogg í gogg og er nálægðin og fjarlægðin. Skuggi sundmannsins er þverlínur á heildarmyndina. Sundmaðurinn fer eitthvað. Vængjamaðurinn er draumur. Maríuerlan veltir fyrir sér hvort spegilmyndin sé hún sjálf.”  HÞF

Helgi Þorgils Friðjónsson er fæddur árið 1953.  Hann stundaði nám við Myndlista- og Handíðaskóla Íslands, De Vrije Academie í Haag Hollandi og við Jan Van Eyck Academie í Maastricht Hollandi. Helgi Þorgils er einn af okkar þekktustu listamönnum, hann hefur bæði kennt myndlist ásamt því að vera virkur í stjórnar og nefndarstörfum í listheiminum.

Hann hefur haldið fjöldann allan af  einkasýningum og einnig tekið þátt í fjölda samsýninga bæði hér á landi og erlendis. Verk eftir Helga Þorgils  eru m.a. í eigu Listasafn Íslands, Listasafn Reykjavíkur, Nýlistasafninu, Listasafni Háskóla Íslands, í fjölda listasafna í Svíþjóð, Finnlandi, Danmörku, Þýskalandi, Frakklandi, Bandaríkjunum og víðar.

Verða verk Helga Þorgils til sýnis á Safnanótt og um þá helgi, 7.-9. febrúar í sal félagsins, Hafnarhúsinu, Tryggvagötu 17, hafnarmegin. Þá verða Grafíkvinamyndirnar einnig kynntar eins og verið hefur. Safnanóttin sjálf verður föstudaginn 7. febrúar og verður þá opið í Grafíksalnum kl 18:00-21:00, en einnig verður opið laugardag og sunnudag kl 14:00-17:00. Það eru ennþá fáanleg verk eftir m.a. Kristján Davíðsson, Kristínu Gunnlaugsdóttur og fl.

Tilboð fyrir Grafíkvini, “Innrammarinn” á Rauðarástíg er með 20% afslátt á innrömmun á Grafíkvinamynd.  

Grafíkvinir eru mikilvægur bakhjarl félagsins.                                                    

 Öll velkomin! Ókeypis aðgangur! 

“Alls engin þekking” Hlynur Helgason

isgrafik

Hlynur Helgason opnar sýninguna, “Alls engin þekking”, föstudaginn 17. janúar kl 17:30 í Grafíksalnum, Hafnarhúsinu, Tryggvagötu 17 (hafnar megin).

Verkin á sýningunni er ný röð bláprenta frá þessu ári, niðurstöður rannsókna á möguleikum gervigreindar í myndgerð. Sýningin er hluti Ljósmyndahátíðar. Hún stendur til 2. febrúar og verður opin fimmtudaga til sunnudaga frá 14–18. Léttar veitingar verða í boði. Verið öll hjartanlega velkomin.

Hlynur Helgason invites you to attend the opening of his exhibition, Not a knowledge at all, which will be opened in the IPA Gallery, behind Hafnarhús on Tryggvagata in Reykjavík, on Friday, 17 January at 17.30.

The works in the exhibition are a new series of cyanotypes from this year, the results of research into the possibilities of artificial intelligence in image production. The exhibition is part of the Icelandic Photo Festival. It will be open until 2 February, Thursdays to Sundays from 2–6 pm.Light refreshments will be served. We welcome you all.

VÆRÐ – Brynja Emilsdóttir

isgrafik

Í tilefni af fimmtugsafmæli mínu langaði mig að gera eitthvað sem veitir mér ánægju og kem aftur og aftur að í gegnum lífið. Þessi sýning er ekki síst fyrir sjálfa mig á þessum tímamótum enda textíllinn löngu orðinn hluti af sjálfri mér.

Opnun 4. janúar kl 16-19

Opið 5.-12. janúar kl 16-18 alla daga.

Öll hjartanlega velkomin

Sjöfætlan: Samsýning 

isgrafik

Sjöfætlan: Samsýning nokkurra nýliða í Grafíkfélaginu: Bjargey Ólafsdóttir, Eirún Sigurðardóttir, Hjörtur Matthías Skúlason, Jóhanna Sveinsdóttir, Rossana Silvia Schiavo, Rósmarý Hjartardóttir og  Sævar Karl. 

Þó að listafólk Sjöfætlunnar séu öngvir nýliðar á sviði myndlistarinnar hefur það tekið þau nokkur ár, jafnvel áratugi, að safna sér saman og staðfesta tilveru sína sem meðlimi Grafíkfélagsins eins og þau gera nú með þessari sprellfjörugu nýliðasamsýningu. Sjöfætlan er ekki við eina fjölina felld þegar kemur að hugmyndum og úrvinnslu þeirra, enda vinnur hún í alla þá miðla sem henni sýnist og býður upp á fjölbreytta samsýningu með útsaumi, mjúkum skúlptúrum, teikningum, mál- og grafíkverkum af ýmsum stærðum og gerðum á breiðu verðbili.

Öll velkomin að gleðjast með fætlunni og njóta verka hennar, búss og djúss, 5. desember 2024  milli kl 17-19, í Grafíksalnum, Hafnarhúsinu, Tryggvagötu 17, Reykjavík.

Opið fim – sun milli kl 14-18 frá 6. til og með 22. desembers

 The Seven Legged Creature

A group art exhibition by new members of The Icelandic Printmakers Association: Bjargey Ólafsdóttir, Eirún Sigurðardóttir, Hjörtur Matthías Skúlason, Jóhanna Sveinsdóttir, Rossana Silvia, Rósmarý Hjartardóttir and Sævar Karl.

Despite the members of the Seven Legged Creature being no newbies in the art world, it’s taken them years to get together and confirm their membership at The Icelandic Printmakers Association as they now do with this group exhibition. The Seven Legged Creature isn’t short of ideas and ways to bring them to life. Using a range of media including embroidery, soft sculptures, drawings, paintings and prints, pieces of all shapes and sizes and price ranges.

Everyone is welcome to join the Seven Legged Creature and enjoy its creations, including booze and juice on the 5th of December between 17pm-19pm at Grafíksalur, Hafnarhúsið, Tryggvagata 17, Reykjavík. Open Thursday to Sunday between 14pm – 18pm from the 6th – 22nd of December.

L’eptapode – Sjöfætlan

Mostra collettiva dei nuovi artisti ammessi quest’anno alla Grafíkfélag (Assocazione della Grafica): Bjargey Ólafsdóttir, Eirún Sigurðardóttir, Hjörtur Matthías Skúlason, Jóhanna Sveinsdóttir, Rossana Silvia, Rósmarý Hjartardóttir e Sævar Karl.

Sebbene gli artisti de L’eptapode non siano principianti nel campo dell’arte, ci sono voluti diversi anni, addirittura decenni, per riunirsi e confermare la loro esistenza come membri dell’Associazione della Grafica, come stanno facendo ora con questa vivace mostra collettiva per i nuovi iscritti.

L’eptapode non è uno qualunque quando si tratta di idee e della loro elaborazione, poiché lavora con tutti i media che ritiene adatti e offre una mostra collettiva diversificata con ricami, sculture morbide, disegni, dipinti e opere grafiche di varie dimensioni e forme in un’ampia fascia di prezzo.

Tutti sono i benenuti alla mostra de L’eptapode e tutti sono invitati a godersi le opere e il rinfresco il 5 dicembre 2024 dalle 17 alle 19, alla Grafíksalur, Hafnarhúsin, Tryggvagötu 17, Reykjavík.

Aperto da giovedì a domenica dalle 14 alle 18 dal 6 al 22 dicembre.

Ljósberar á mínum vegum – Svandís Egilsdóttir

isgrafik

Svandís Egilsdóttir opnar sýningu í Grafíksalnum í dag kl 16:00Ljósberi á vegi mínum – Ljósberar á mínum vegumTitill sýningarinnar Ljósberi á vegi mínum – Ljósberar á mínum vegum, vísar til upplifunar og minningar listakonunnar af því að hafa ekið fram á breiðu af ljósberum á Mýrdalsöræfum eina fagra, bjarta, sumarnótt á þessu ári. Á sýningunni má finna málverk unnin á striga sem og teikningar og tímahylki/dagbækur frá vinnu- og vinkonuferðum sem listakonan hefur farið í undanfarin ár. Hver litur ber í sér mismunandi tíðni ljóss. Það að mála er því eins konar leikur með ljós. Rétt eins verkefni sem snýst um að teikna og mála við vita um allt land er það líkaRétt eins og að finna uppljómun í flæðinuRétt eins og sköpunin sjálfRétt eins og vináttanRétt eins og að vinna á eigin forsendum að því sem er manni kærtÍ öllu þessu er þetta magnaða ljósHeilög frumgerð, ljósið Verkið sem prýðir forsíðu þessa bæklings, er mynd af upplifun minni af fjallinu Snæfelli.Það fjall er heilagur staður í mínum huga og frá því skynja ég orkumikla tíðni. Frumkraftur og andagift er til staðar, eitthvað sem leiðir hugann hærra, í átt að draumkenndri fegurð. Snæfell er fyrir mér ljósberi, rétt eins og vitarnir sem ég heimsótti í sumar og málverkin sem ég vinn að, tímahylkin/dagbækurnar sem geyma dýrmætt afrit af túlkun minni á stað og tíma og ljósinu sjálfu. Á sýningartímabilinu verður stund tileinkuð gjörningi og lokadaginn 1. des verður sölusýning/vinnustofustemming þar sem fleiri verk verða til sölu, ásamt því að boðið verður upp á ilmandi danskar eplaskífur og drykk. Hluti af andvirði hverrar myndar rennur til Bergsins Headspace (https://www.bergid.is/)Bergið veitir einstaklingsmiðaða ráðgjöf og þjónustu til ungmenna frá 12 til 25 ára með markmiðið að efla þátttöku og þekkingu ungmenna sem og að auka tengsl þeirra við samfélagið.

Tímamót – Gunnhildur Ólafsdóttir

isgrafik

Verið velkomin á opnun sýningar minnar Tímamót, föstudaginn 1. nóvember kl 17-20 í Grafíksalnum, Tryggvagötu 17 (hafnarmegin).

Sýningin stendur til og með 10. nóv og verður opið þriðjudag til sunnudags kl 14-18.

Tímamót: tilraunir og tilviljanir

Verk mín eru aðallega unnin sl. 3 ár en nokkur eldri fá að fylgja með á þessum tímamótum. Þau eru unnin með mismunandi aðferðum grafíkþrykks, eins og tréristur, æting, mezzotint, sólarþrykk, lithografí og frjálst handþrykk. Myndefni mitt er náttúran mikil eða minni í sveit og borg kallar á mismunandi tilraunir grafíktækninnar.

Með aldrinum hef ég nálgast myndefni og tækni með meira frelsi en áður, fer frjálslegar með og jafnvel persónulegri nálgun fyrir bragðið. Hugmyndir spretta upp gjarnan í náttúrunni eða á göngu um „göturnar mínar“ í Reykjavík og seinna meir víðar. Í vinnuferlinu koma nýjar hugmyndir til mín gjarnan eins og elding og sumar hverfa jafnskjótt aftur. Þær nýtast þó vel stundum ef ég man þær og þá aðallega núna í brunnloka myndum mínum.

Brunnlokin
Hugmyndin þar að baki var í upphafi að þrykkja af brunnlokum gatna í Reykjavík sem ég hef búið við en á ferð minni í Noregi bættist við brunnlok í Sandnes, þar sem við hjónin vorum með barnabörnum í nokkra daga. Brunnlokin þar voru svo skrautleg að ég stóðst ekki mátið, græjaði mig upp og þrykkti. Ég var kölluð í forfallakennslu í skóla í Grafarvogi nú á haustdögum og á skólalóð þar tók ég eftir mjög skrautlegu brunnloki sem ég læddist að á sunnudegi með manni mínum og þrykkti en það var grískt mynstur á brunnlokinu. Það hefur verið mikil upplifun að þrykkja af brunnlokunum og talsverð áskorun en sérdeilis skemmtileg, sér í lagi viðbrögð fólks við þessu uppátæki mínu, börn og fullorðnir brugðust mismunandi við og átti ég stundum skemmtileg samtöl við fólkið sem staldraði við. Þá upplifði ég líka undarleg „flashback“ augnablik sem voru jafnvel soldið dularfull enda á æskuslóðum og öðrum stöðum sem vöktu upp sterkar minningar.

Verið öll hjartanlega velkomin.

GÓLA
Gunnhildur Ólafsdóttir

Ég lauk námi í grafíkdeild MHÍ og kennaranámi í KHÍ en áður hafði ég lokið Tækniteiknun. Hef kennt myndlist yfir þrjátíu ár ásamt því að vera alltaf með vinnustofu með minni grafíkpressu. Ég hef í gegnum árin farið á mörg endurmenntunarnámskeið í myndlist/grafík og kennslu á Íslandi og á Norðurlöndum, og fór einnig í listfræði í HÍ.

Nokkrar einkasýningar hef ég haldið og tekið þátt í mörgum samsýningum í gegnum árin, bæði hér heima og erlendis td. í Stokkhólmi, Turku og New York.

“Arkir ” – Elva Hreiðarsdóttir

isgrafik

Elva Hreiðarsdóttir opnar sýningu sína Arkir föstudaginn 11. október kl. 17-20 í Grafíksalnum, Tryggvagötu 17, hafnarmegin.

Verk Elvu eru unnin með fjölbreyttum aðferðum en eiga það sameiginlegt að innihalda pappírsarkir m.a. gerðar af henni sjálfri. 

Í verkum Elvu veltir hún fyrir sér ýmsu sem hefur haft áhrif í lífinu almennt persónulega og skrásetur á arkir í ýmsum útfærslum. 

Sýningin stendur til og með 20. október. 

Opið fimmtudaga til sunnudaga kl. 14-17. 

Öll hjartanlega velkomin.

Hugsýn í hálfa öld -Margrét Jónsdóttir

isgrafik

Margrét Jónsdóttir opnar sýninguna Hugsýn í hálfa öld í Grafíksalnum næstkomandi laugardag, 14. september, kl 14:00. Sýningin mun standa yfir til 29. september. Verið öll hjartanlega velkomin.

Listmálarinn Margrét Jónsdóttir er fædd í Reykjavík árið 1953 og starfar að list sinni í Frakklandi og Íslandi. Hún hefur starfað sem myndlistarmaður í hálfa öld og eru 49 ár frá fyrstu sýningu hennar í London. Menntuð við Myndlista og Handíðaskóla Íslands, diplóma í frjálsri myndlist/grafík árið 1974. Masternám (Postgraduate) við Central Saint Martin’s College of Art í London árin 1974 til 1976. Myndlista og Handíðaskóli Íslands, diplóma í grafískri hönnun árið 1984. Diplóma frá Kennaraháskólanum árið 1997. Margrét hefur haldið yfir 50 einkasýningar og tekið þátt í fjölda samsýninga hér á landi og erlendis. Margrét var einn af stofnendum Gallery Suðurgötu 7 sem var mikilvæg miðstöð í þróun framlínumyndlistar á Íslandi. Hún er í ritinu „Íslensk listasaga, sem er fimm binda verk og spannar tímabilið frá síðari hluta 19. aldar til upphafs 21 aldar. Einn af stofnendum og í stjórn Hagsmunafélags Myndlistarmanna sem var undanfari Sambands Íslenskra Myndlistarmanna en eina markmið félagsins var að stofna hagsmunasamtök sem varð SÍM. Verk eftir Margréti eru í eigu helstu listasafna landsins. Hún hefur hlotið ferðastyrki og starfslaun listamanna. Félagi í FÍM, Íslensk Grafík, SÍM, Nýlistasafninu. Margrét hlaut norræn vatnslitaverðlaun the Winsor & Newton/ NordicWatercolor Association Prize 2023.

TIL MÓTS VIÐ TILVERUNA – Jóhanna Hreinsdóttir

isgrafik

Verið velkomin á opnun sýningarinnar TIL MÓTS VIÐ TILVERUNA fimmtudaginn 29 ágúst kl.17-19 í Grafíksalnum, Hafnarhúsinu, Tryggvagötu 17, hafnarmegin.

Sýningin stendur til 8. september og verður opið fimmtudaga til sunnudaga kl.14-18

Jóhanna reynir að fanga hið skynræna handan tungumálsins, vitundina sem leitast stöðugt við að skapa, hreyfinguna sem leitast við að móta, forma og festa, en um leið að ýta við hinu formaða og brjóta það upp í ófyrirsjáanleika sínum. Margbreytileiki og óútreiknanleg framvinda lífsins eru þannig uppspretta hugmynda hennar. Allt frá fyrstu pensilstroku til þeirrar síðustu eiga sér stað mörg samtöl – frá einu augnabliki til annars – þar sem ekkert er fyrirfram ákveðið. Ferlið þróast og tekur breytingum rétt eins og lífið sjálft. Leitin inn á við verður þannig kveikja að óendanlegum uppgötvunum og nýrri upplifun sem skapar verkunum nánd og varanleika. Þannig öðlast það sinn eigin hljóm.

Núllstilling – Jóhanna Sveinsdóttir

isgrafik

Jóhanna Sveinsdóttir mun opna sýninguna Núllstilling laugardaginn 27. júlí 2024 kl 15:00 í Grafíksalnum, Hafnarhúsinu, Tryggvagötu 17, hafnarmegin.

Sýningin mun standa til 11. ágúst og verður opið þriðjudaga til sunnudaga kl 14:00-17:00. Öll hjartanlega velkomin. 

Verkin á sýningunni eru unnin eru unnin út frá orðunum ,,öruggur staður / leiðarljós´´. Öruggur staður er slökunaræfing þar sem þú leitar inn á við og finnur þinn örugga stað úti í náttúrunni. Hvað Jóhönnu varðar er hennar staður á æskuslóðum í sveitinni, innan um gróður þar sem grasið og birkið ilmar, lækur seytlar og fuglar flögra um og syngja. Leiðarljós lýsir áfram veginn en í hluta verkanna nota hún ljós. Verkin eru öll einþrykk og oftast þrykkir hún mörgum sinnum á sama flötinn og vinnur ofan í þau. Marglaga þrykkin kölluðu á ljós til að lýsa upp lög þrykksins og fyrir Jóhönnu gefur það tilfinningu fyrir jarðlögum og liðnum duldum tíma, fólki, dýrum og plöntum sem áður lifðu. Ljósaverkin í innri salnum eru hugsuð sem staður til að slaka á og núllstilla sig, draga andann djúpt og ef vill loka augunum og finna staðinn sinn.      

Sýningin er tileinkuð minningu föður Jóhönnu, Sveins Finnssonar bónda og listunnanda, sem lést árið 2022. Hugsanir og minningarbrot frá æskuárunum hafa ratað inn í verkin og bera sum vott um orðfærið í sveitinni og hve vel var fylgst með veðurfari, árstíðum, fuglum, gróðri og fleiru, hlutum sem sumir leiða kannski aldrei hugann að og eru merki um rofnandi tengsl mannsins frá náttúrunni og grunninum. Sumir hafa jafnvel aldrei gengið í þúfum eða upplifað þögn eða myrkur úti í náttúrunni. Á móti er bóndinn samtvinnaður og háður jörðinni, veðri og vindum. Hið smáa hefur mikið vægi, gróðurinn, trén, blómin, sem er undirstaða alls og ómissandi í stóra samhenginu en má sín lítils á móti sterkari öflum.